Ֆրանչիսկոս Պապը Սուրբ Երկրի մէջ` ուխտագնացութիւն դէպի արմատները։
«Ակնաղբիւր»՝ հնագոյն բառերէն է, որուն մեր դարաշրջանը նոր արժէք տուած է: Վերադառնալով
արմատներուն` կը բաղձանք թարմանալ այնպէս ինչպէս սամարացի կինը, որ խորունկ ջրհորէն ջուր
կը քաշէր: Մարդկութեան մէջ միշտ ալ եղած է իր արմատներուն վերադառնալու այս անյագուրդ
բաղձանքը: Միջնադարեան բազմաթիւ ուխտագնացութիւններ, որոնք ամբոխը ճամբայ կը հանէին դէպի
Հռոմ եւ Երուսաղէմ, իրականութեան մէջ անոնք դրդուած էին «Ակնաղբիւր»ի վերադառնալու բաղձանքէ:
Մեր նախահայրերը ուխտագնացութեան ցուպը առնելով, կը ձգէին իրենց հայրական տունը` ինքզինքնին
ենթարկելով աներեւակայելի վտանգներու` հասնելու համար այն վայրը ուրտեղէն կը տարածուէր
«Ակնաղբիւրը»: Կտրել անցնելով տարածութիւններ կը կանխէին ժամանակը…: Սակայն ներկայիս
տարածութիւնը գրեթէ վերցուած է, այլեւս այդ երկար ճամբորդութիւնը չկայ: Երուսաղէմը Հռոմէն
ընդամենը օդանաւի թռիչքի մը հեռաւորութիւնը ունի: Առաջին թռիչքները` Հռոմէն դէպի Երուսաղէմ,
ժամանակի կանխում մը եղան` տեսանելի կերպով վերամիաւորելու Եկեղեցին այն վայրերուն հետ
ուրկէ ծնունդ առած է, վերադառնալու այն միակ Ակնաղբիւրին որ է Յիսուսի արիւնը. Ինչպէս
որ Ս. Յովհաննէսի Աւետարանը կ’ըսէ. «Եկեղեցին կը ծնի Յիսուսի խոցուած սրտէն, ուրտեղէն
կը հոսէին եւ կը շարունակեն հոսիլ միշտ Մկրտութեան ջուրն ու հաղորդութեան արիւնը»:
Եթէ այս առաջին քսանդարեայ պատմութեան մէջ եղած է ուխտագնացութիւն մը դէպի «Ակնաղբիւր»ը,
ապա այն իրագործած է Պօղոս Զ որուն կատարած ուխտագնացութիւնը նոր հորիզոններ բացաւ Եկեղեցւոյ
առջեւ: Երուսաղէմ – Հռոմ. Այս երկու անունները կը հանդիսանան երկու բեւեռները, որոնց
շուրջ կը դառնան հաւատացեալներու եւ սուրբերու խորհրդաւոր գունդը: Աստուծոյ ծրագրին մէջ
Երուսաղէմը` Յիսուսի կրօնին կեդրոնը կը նկատուի որ պիտի իրականացնէր Իսրայէլի յոյսը:
Մինչեւ 63թ. Կայսրութեան մէջ տարածուած քրիստոնեաներն ու հրեաները կ’աղօթէին նոյն ուղղութեամբ.
Երուսաղէմի Տաճարի ուղղութեամբ: Սակայն, Երուսաղէմը գրաւուեցաւ, հրեաները ցրուեցան: Պետրոս
եւ Պօղոս մարտիրոսացան Կայսրութեան կեդրոնը եւ այսպիսով Հռոմը` քրիստոնեաներու համար
դարձաւ երկրորդ Երուսաղէմ, սակայն չգերազանցեց առաջինը` ճշմարտապէս սուրբ Երկիրը, միակ
Պատահարի վայրը, պատմութեան կեդրոնն ու օճախը, որու շուրջ կը դառնայ մարդկութեան ամբողջ
պատմութիւնը` Մարդեղութիւնը: Իրապէս, Պետրոսի յաջորդներու համար «դէպի Երուսաղէմ
բարձրանալ»ը բազմաթիւ արգելքներու հանդիպած է, սակայն այս արգելքներու բարձումով շատ
տրամաբանական էր որ Քրիստոսի ներկայացուցիչը իր քայլերը դնէր իր միակ Տիրոջ քայլերուն
վրայ: Ամէն Քահանայապետի այցելութիւն իր կարեւորութիւնը ունեցած է իր յաջորդին առնելիք
քայլերուն վրայ: Այսպիսով, կարելի չէ մոռնալ Պօղոս Զ Պապի այցելութիւնը եւ եղբայրական
հանդիպումը Աթենակորաս Պատրիարքին հետ: Նուազ յիշատակելի չէ Յովհաննէս Պօղոս Բ այցելութիւնը
եւ աղօթքը «Ողբի Պատ»ին առջեւ: Չենք կրնար չյիշել նաեւ Պենետիկտոս ԺԶ այցելութիւնը եւ
կրօնի առաջընթացի մասին արտայայտած իմաստալից մտքերը: Ամէն այցելութիւն զօրացուց
Յիսուսի երկրին մէջ բնակող քրիստոնեաներու եւ Ընդհանրական Եկեղեցւոյ միջեւ եղած կապը:
Այժմ պէտք ենք հետեւիլ` գիտնալու համար թէ Աստուած ինչ կ’ուզէ ընել Ֆրանչիսկոս Պապին
միջոցով: Ամէն Քահանայապետ ունի իր անհատականութիւնը, զգայնութեան եւ յաղորդակցութեան`
իրեն յատուկ կերպը: Պօղոս Զ, Յովհաննէս Պօղոս Բ, Պենետիկտոս ԺԶ եւ Ֆրանչիսկոս պապերը
իրարմէ բոլորովին տարբեր անհատականութիւններ են: Իրենց անհատականութիւնները կը խաչուին
քրիստոնէութեան եւ հասարակութեան զարգացման հանգրուանի վրայ: Եկեղեցին պէտք չէ մոռնայ
իր «արմատները» այլ պէտք է յարատեւ վերադարձ մը ունենայ, որպէսզի կարենայ համապատասխանել
Աստուծոյ ծրագիրներուն: Վերջին տասնամեակներուն` յատկապէա Վատիկանեան Բ Տիեզերական Ժողովէն
վերջ, բեղուն երկխօսութեան ընթացք մը կատարուեցաւ այն ժողովուրդին հետ, որ Աստուած ընտրած
էր` ըլլալու առաջին հասցէատէրը Իր «Ուխտ»ի խոստումներուն: Բոլոր Քահանայապետներու
համար Սուրբ Երկիրը փրկութեան պատմութեան վայրն է` Յիսուսի երկիրը: Ֆրանչիսկոս Պապը
կ’ընդգծէ իր կատարելիք ուխտագնացութեան կարեւորութիւնը, մեզի կ’օգնէ աւելի խոր կերպով
հասկնալու Տիրոջ եւ փրկութեան պատմութեան կեդրոնականութիւնը, որ տեղի ունեցած է որոշ
ժամանակի եւ աշխարհագրական յստակ վայրի մը մէջ: Այս` Հռոմի Սրբազանի` Պետրոսի Յաջորդին
ուխտագնացութիւնն է դէպի հաւատքի պատմական եւ աշխարհագրական արմատները: Կը Յուսանք որ
Ֆրանչիսկոս Պապին ուխտագնացութիւնը` Միջին Արեւելքի բոլոր քրիստոնեաներուն համար զօրակցութեան
զօդ մը ըլլայ: Առանց այս քրիստոնեաներուն` արաբներու եւ իսրաէլացիներու հաշտութիւնը անհնարին
պիտի ըլլայ: